DİN: “59 ədəd yol nişanları və göstəricilər gizli yolla talanıb”


DİN: “59 ədəd yol nişanları və göstəricilər gizli yolla talanıb”

Daxili işlər orqanları tərəfindən ümumən cinayətkarlığa, o cümlədən dövlət əmlakının oğurlanması hallarına qarşı qətiyyətli mübarizə tədbirləri davam etdirilir.

Daxili İşlər Nazirliyindən Cebhe.info-ya verilən məlumata görə, cari il aprel ayının 28-nə keçən gecə Bakı-Şamaxı-Yevlax avtomobil yolunun hər iki istiqamətində quraşdırılmış yol nişanlarının oğurlanması barədə Baş Dövlət Yol Polisi İdarəsinə məlumat daxil olub.

Məlumatla əlaqədar aparılmış araşdırmalarla qeyd olunan avtomobil yolunun 26-101-ci kilometrliyində - Şamaxı və əks istiqamətlərdə nəqliyyat vasitələrinin təhlükəsiz və nizamlı hərəkətini təmin etmək, habelə yol hərəkəti iştirakçılarını məlumatlandırmaq məqsədilə quraşdırılmış 59 ədəd yol nişanları və göstəricilərinin gizli yolla talandığı məlum olub.

Faktla bağlı Daxili İşlər Nazirliyinin Baş İstintaq və Təhqiqat İdarəsində Cinayət Məcəlləsinin müvafiq maddələrilə cinayət işi başlanıb.

Baş İstintaq və Təhqiqat İdarəsi və Baş Dövlət Yol Polisi İdarəsi əməkdaşlarının birgə keçirdikləri istintaq-əməliyyat tədbirləri ilə müəyyən edilmişdir ki, “Yol Nişan” MMC-nin direktoru Şamxal Qurbanov tanışları Bəxtiyar Umudov, Elşad Mənəfov və Elgün Salahovla qabaqcadan əlbir olaraq aprelin 27-dən 28-nə keçən gecə sözügedən magistral yolun qeyd olunan hissəsində quraşdırılmış yol nişanları və göstəricilərini oğurlayaraq Azərbaycan Avtomobil Yolları Dövlət Agentliyinə ümumilikdə 6,4 min manata yaxın maddi ziyan vurub.

Mayın 8-də adlarıçəkilən şəxslər polis əməkdaşları tərəfindən şübhəli şəxs qismində tutulmuş, oğurlanmış yol nişanları və göstəricilər aşkar olunaraq maddi sübut kimi götürülüb.

Hazırda cinayət işi üzrə zəruri istintaq-əməliyyat tədbirləri davam etdirilir.

Vilayət Muxtar
Cebhe.info


Oxunma sayı: 56