Keçmiş MTN əməkdaşının cəzası azaldıldı

Keçmiş MTN əməkdaşının cəzası azaldıldı

Keçmiş Milli Təhlükəsizlik Nazirliyi (MTN) Nəqliyyat və Energetika Sahələrində Təhlükəsizlik Baş İdarəsinin tabeliyindəki idarələrdən birinə rəhbərlik etmiş Akif Əliyevin cəzası bir il azaldılaraq, 4 ilə endirilib.

Virtualaz.org-un xəbərinə görə, bu barədə Ali Məhkəmədə qərar çıxarılıb. Qərara əsasən, A.Əliyevə verilən ittiham maddələri də dəyişib.

A.Əliyev Nəqliyyat və Energetika Sahələrində Təhlükəsizlik Baş İdarəsinin rəisi Akif Çovdarovla birlikdə mühakimə olunub. Bakı Hərbi Məhkəməsinin hökmü ilə 12 il azadlıqdan məhrum edilən A.Çovdarov da vəkili Kamandar Nəsibov vasitəsilə Ali Məhkəməyə kassasiya şikayəti vermişdi. Hətta onun oğlu Ruslan Çovdarov və qızı Aida Qasımova da ataları haqqında hökmdən, onların adına olan əmlakların müsadirəsi hissəsilə əlaqədar şikayət etmişdilər. Amma Akif Çovdarov saxlanıldığı 9 saylı cəzaçəkmə müəssisəsindən Ali Məhkəməyə məktub göndərərək, kassasiya şikayətini geri götürmək istədiyini bildirib. Məhkəmə də onun ərizəsini nəzərə alaraq, şikayətin baxılmadan geri qaytarılması barədə qərar qəbul edib. Bir müddət sonra keçmiş general yenidən fikrini dəyişib və bir daha kassasiya şikayəti verib.

Xatırladaq ki, 2015-ci ilin oktyabrında MTN-də keçirilmiş əməliyyat nəticəsində nazirliyin 21 əməkdaşı cinayət məsuliyyətinə cəlb olunub. Onlardan biri – MTN-in Antiterror Mərkəzinin rəis müavini olmuş polkovnik İlqar Əliyev həbsindən iki ay sonra saxlandığı istintaq təcridxanasında intihar edib.

Qalan 20 nəfərin işi bir neçə yerə ayrılıb. Nazirliyin İstintaq İdarəsinin şöbə rəisi olmuş Vüsal Ələkbərov və Əks-Kəşfiyyat İdarəsinin keçmiş şöbə rəisi Mirəziz Əsgərov ayrılıqda mühakimə olunublar. M.Əsgərova 3, V.Ələkbərova 12 il cəza verilib.

Bakı Apellyasiya Məhkəməsi keçmiş müstəntiq V.Ələkbərovun cəzasını 5 ilə endirib. MTN generalı Akif Çovdarov nazirliyin Energetika və Nəqliyyat Sahələrində Təhlükəsizlik İdarəsində onun tabeliyində işləmiş daha üç nəfərlə birlikdə məhkəmə qarşısına çıxarılıb. Çovdarova 12, işçilərinə isə 4 ildən 11 ilədək həbs cəzası kəsilib.

Uzun illər MTN-in Antiterror Mərkəzinə rəhbərlik etmiş general Elçin Quliyev də keçmiş işçisi Azər Mehdiyevlə birlikdə məhkum edilib. E.Quliyev 10 il 6 ay, işçisi isə 8 il azadlıqdan məhrum olunub.

Nazirliyin Transmilli İqtisadi Cinayətkarlıqla Mübarizə İdarəsinin rəisi olmuş general Sübahir Qurbanov, Monitorinq Mərkəzinin sabiq rəisi, general Teymur Quliyev, Natəvan Mürvətova və daha yeddi nəfər isə birlikdə mühakimə olunub. Hökmə əsasən, təqsirləndirilən şəxslərdən üçünə, o cümlədən N.Mürvətovaya şərti cəza, qalanlarına isə 3 ildən 14 ilədək həbs verilib.

Bakı Hərbi Məhkəməsinin hökmündə onların rütbələrinin alınması, bir çox əmlaklarının müsadirəsi də var. Onlardan təxminən iki il sonra – 2017-ci ilin noyabrında sabiq nazir Eldar Mahmudovun köməkçisi olmuş əmisi oğlu Vüqar Mahmudov da həbs olunub. Hazırda onun məhkəməsi gedir.

Virtualaz.org

Açar sözlər
Eldar Mahmudov , Elçin Quliyev , Ilqar Əliyev , Akif Çovdarov , Ruslan Çovdarov , Azər Mehdiyev , Teymur Quliyev , Kamandar Nəsibov , Vüqar Mahmudov , Vüsal Ələkbərov , Aida Qasımova , Natəvan Mürvətova , Mirəziz Əsgərov , Bakı Apellyasiya Məhkəməsi , Milli Təhlükəsizlik Nazirliyi , Təhlükəsizlik Baş Idarəsi , Bakı Hərbi Məhkəməsi , Antiterror Mərkəzi , Iqtisadi Cinayətkarlıqla Mübarizə Idarəsi
Hadisə xəbərləri
Virtualaz.org digər xəbərlər