Türkiyə bankının Azərbaycandakı törəməsinin vəziyyəti məlum oldu

Türkiyə bankının Azərbaycandakı törəməsinin vəziyyəti məlum oldu

“Ziraat Bank Azərbaycan” ASC 2019-cu ilin 1-ci rübünü 959 min manat xalis mənfəətlə başa vurub. Müqayisə üçün qeyd edək ki, “Ziraat Bank Azərbaycan”2018-ci ilin 1-ci rübünü 1 milyon 692 manat xalis mənfəət ilə bağlamışdı. Beləliklə, Bankın qazancı 43,3% azalıb. Azlama Bankın ehtimal olunan depozit və kredit itkiləri üçün yaradılan ehtiyata daha çox vəsait ayırması ilə bağlıdır.

“Marja” Bankın rüblük maliyyə göstəricilərinə istinadən xəbər verir ki, 2019-cu ilin Yanvar-Mart dövründə “Ziraat Bank Azərbaycan”ın cəmi gəlirləri 5 milyon 138 min manat, cəmi xərcləri isə 3 milyon 228 min manat təşkil edib. Nəticədə Bankın 1 milyon 910 min manat əməliyyat mənfəəti formalaşıb. Bank əməliyyat mənfəətinin 951 min manatını aktivlər üzrə mümkün zərərlərin ödənilməsi üçün xüsusi ehtiyatın yaradılmasına ayırdığından mənfəəti 959 min manata düşüb.

2018-ci ilin 1-ci rübündə “Ziraat Bank Azərbaycan”ın cəmi gəlirləri 4 milyon 661 min manat, cəmi xərcləri isə 2 milyon 697 min manat, əməliyyat mənfəəti 1 milyon 964 min manat təşkil etmişdi. Bank həmin vaxt ehtiyatlara 272 min manat ayırmışdı.

FAİZ GƏLİRLƏRİ ARTIB, QEYRİ-FAİZ GƏLİRLƏRİ AZALIB

2018-ci ilin 1-ci rübündə “Ziraat Bank Azərbaycan”ın faiz gəlirləri 3 milyon 354 min manat, qeyri-faiz gəlirləri 1 milyon 308 min manat ikən, 2019-cu ilin 1-ci rübündə faiz gəlirləri 4 milyon 445 min manat, qeyri-faiz gəlirləri 693 min manat təşkil edib. Faiz gəlirlərinin daha çox artması (1 milyon 91 min manat ) qeyri-faiz gəlirlərinin azalmasını (-615 min manat) artıqlaması ilə bağlayıb və Bankın cəmi gəlirləri 477 min manat artıb.

Eyni zamanda, “Ziraat Bank Azərbaycan”ın xərcləri də artıb.

Xatırladaq ki, "Zıraat Bank (Azerbaijan)" 2014-cü ildə yaradılıb. Onun nizamnamə kapitalı 50 milyon manatdır. Bankın səhmlərinin 99,98%-i Türkiyənin "Ziraat Bank"ına, 0,01%-i "Zıraat Sıgorta" şirkətinə, 0,01%-i isə "Ziraat Yatırım Menkul Değerler" şirkətinə məxsusdur.

MÜŞTƏRİLƏRƏ VERİLƏN KREDİTLƏR ARTIB

31 Mart 2019-cu il tarixində "Ziraat Bank Azərbaycan"ın cəmi aktivləri 219 milyon 739 min manat, o cümlədən 112 milyon 160 min manatını müştərilərə verilən kreditlər təşkil edib.31 mart 2018-ci il tarixində "Ziraat Bank Azərbaycan"ın 222 milyon 557 min manat cəmi aktivlərinin 79 milyon 414 min manatınımüştərilərə verilən kreditlər təşkil etmişdi.

İqtisadiyyat xəbərləri
Marja.az digər xəbərlər